SKILMÁLI

Leiguskilmálar BGÞ ehf. - Leiga á tölvum, fartölvum, leikjatölvum, skjám og tengdum búnaði.

1. Almenn ákvæði

Þessir skilmálar gilda um leigu á tölvum og tengdum búnaði frá BGÞ ehf., kt. 490925-0820, netfang: tolvuleiga@tolvuleiga.is (hér eftir nefnt „Leigusali“). Með því að leigja tölvu eða annan búnað hjá leigusala samþykkir leigutaki þessa skilmála og skuldbindur sig til að fylgja þeim í hvívetna. Með því að samþykkja þessa skilmála og staðfesta pöntun á vefsíðu leigusala stofnast bindandi leigusamningur milli leigutaka og BGÞ ehf. Leigusali áskilur sér rétt til að breyta þessum skilmálum hvenær sem er. Breyttir skilmálar taka gildi við birtingu þeirra á vefsíðu tolvuleiga.is.

2. Leigutakar

Leigusali leigir búnað bæði til einstaklinga og fyrirtækja. Leigutaki skal vera orðinn 18 ára eða hafa skriflegt samþykki forráðamanns. Fyrirtæki skulu tilgreina ábyrgðaraðila á leigutímanum.

3. Afhending, leigutímabil og lágmarksleiga

Leigutími hefst við afhendingu búnaðar til leigutaka og lýkur þegar búnaðinum hefur verið skilað til leigusala, hann hefur verið yfirfarinn og er í fullkomnu standi. Leigutaki ber ábyrgð á búnaðinum á meðan hann er í hans vörslu, þar á meðal vegna skemmda, taps eða þjófnaðar. Lágmarksleigutími á tölvum er einn (1) mánuður. Þrátt fyrir framangreint getur leigusali, að eigin mati, samþykkt leigu til skemmri tíma en eins mánaðar (t.d. í nokkra daga). Slík leiga telst þó alltaf gjaldskyld sem eins (1) mánaðar leiga, óháð raunverulegri lengd leigutímans. Enginn afsláttur eða endurgreiðsla fæst vegna styttri notkunar. Leiga til skemmri tíma en eins mánaðar er ekki tryggð þjónusta og er eingöngu í boði ef tölvur eru lausar og aðstæður leyfa. Leigusali áskilur sér fullan rétt til að hafna slíkum beiðnum án frekari skýringa. Leiga er í formi mánaðarlegrar áskriftarleigu og er greidd mánaðarlega með skráðu greiðslukorti. Leigan heldur áfram sjálfkrafa frá mánuði til mánaðar þar til henni er sagt upp samkvæmt grein 15. Uppsagnarákvæði. Leigutaki getur, við upphaf leigu, tilgreint áætlaðan leigutíma ef hann hefur ákveðinn leigutíma í huga. Slík tilgreining er ekki bindandi og breytir ekki því að leigan er ótímabundin áskriftarleiga. Óski leigutaki eftir að segja leigunni upp áður en hinn áætlaði leigutími er liðinn, fer uppsögn samkvæmt ákvæðum 15. greinar þessara skilmála.

4. Eignarréttur að búnaði

Allur búnaður sem leigusali afhendir samkvæmt leigusamningi, þar á meðal borðtölvur, fartölvur, leikjatölvur, skjáir, fylgihlutir og annar búnaður, er og skal ávallt vera eign BGÞ ehf., nema annað sé sérstaklega samið skriflega. Leigutaki öðlast engan eignarrétt að búnaðinum með greiðslu leigugjalda eða með öðrum hætti. Við lok leigusamnings skal búnaði skilað til leigusala án tafar í samræmi við skilmála þessa samnings.

5. Framboð og samþykki pantana

Allar pantanir eru háðar framboði og teljast ekki bindandi fyrr en þær hafa verið staðfestar af leigusala. Leigusali áskilur sér rétt til að hafna pöntun, hvort sem er vegna mikillar eftirspurnar, takmarkaðs framboðs, rekstrarlegra ástæðna eða annarra aðstæðna, án bótaskyldu.

6. Innifalið í leigu

Í leigunni er innifalinn sá búnaður sem leigutaki hefur valið, svo sem borðtölva, fartölva, leikjatölva (t.d. PlayStation 5), tölvuskjár eða annar búnaður samkvæmt pöntun, ásamt þeim fylgihlutum og hugbúnaði sem leigusali útvegar. Leigutaki getur valið að bæta við tryggingu gegn tjóni eða þjófnaði gegn mánaðarlegu aukagjaldi samkvæmt verðskrá leigusala.

7. Trygging og ábyrgð

Ef leigutaki hefur keypt tryggingu samkvæmt gildandi verðskrá leigusala tekur hún til skyndilegs og ófyrirsjáanlegs tjóns á leigðum búnaði og þeim fylgihlutum sem leigusali afhendir með honum, sem verður við eðlilega notkun, svo sem vegna falls, höggs, óviljandi vökvatjóns eða annarra sambærilegra óhappa. Tryggingin tekur einnig til þjófnaðar á búnaðinum og meðfylgjandi fylgihlutum, enda hafi leigutaki sýnt eðlilega aðgæslu og tilkynnt þjófnað tafarlaust til lögreglu og leigusala. Ef tjón fellur undir trygginguna greiðir leigutaki eigin áhættu vegna hvers tjónsatviks. Eigin áhætta nemur að lágmarki 20.000 kr. Sé mánaðarlegt leigugjald fyrir hinn leigða búnað hærra en 20.000 kr., nemur eigin áhætta fjárhæð sem samsvarar einni (1) mánaðarleigu samkvæmt gildandi leigusamningi. Við útreikning eigin áhættu telst tryggingagjald eða önnur viðbótargjöld ekki hluti af mánaðarlegu leigugjaldi. Tryggingin tekur ekki til: Tjóns sem rekja má til ásetnings eða stórkostlegs gáleysis leigutaka. Tjóns sem stafar af rangri, óeðlilegri eða óheimilli notkun búnaðarins. Tjóns vegna breytinga eða viðgerða sem framkvæmdar eru án samþykkis leigusala. Taps eða þjófnaðar þegar búnaður hefur verið skilinn eftir án eðlilegrar gæslu eða ólæstur þar sem sanngjarnt hefði verið að tryggja hann betur. Týndra eða skemmdra fylgihluta, svo sem hleðslutækja, kapla, millistykka, stýripinna eða annarra aukahluta, nema annað sé sérstaklega tekið fram. Leigutaki skal tafarlaust tilkynna leigusala um bilun, tjón, tap eða þjófnað á búnaðinum. Hafi leigutaki ekki keypt tryggingu ber hann fulla fjárhagslega ábyrgð á öllu tjóni, tapi eða þjófnaði á búnaðinum á meðan hann er í hans vörslu.

8. Greiðsluskilmálar

Leiga er greidd mánaðarlega fyrirfram með greiðslukorti sem leigutaki skráir við gerð leigusamnings. Leigutaki ber ábyrgð á að greiðslukort sé gilt og að næg heimild sé til staðar fyrir mánaðarlegri greiðslu. Takist greiðsla ekki áskilur leigusali sér rétt til að reyna innheimtu á ný, innheimta dráttarvexti og innheimtukostnað samkvæmt lögum, stöðva þjónustu eða innkalla leigðan búnað. Ef greiðsla hefur ekki borist innan 7 daga frá gjalddaga áskilur leigusali sér rétt til að rifta samningi og krefjast tafarlausra skila á búnaði.

Leiga fyrir skammtímaleigu (t.d. nokkra daga) skal greidd fyrirfram við afhendingu búnaðar.

9. Notkun og meðferð búnaðar

Leigutaki skuldbindur sig til að fara vel með búnaðinn og nota hann í samræmi við leiðbeiningar leigusala. Óheimilt er að setja upp, fjarlægja eða breyta hugbúnaði, eða nota búnaðinn í ólögmætum tilgangi. Leigusali ber ekki ábyrgð á gögnum eða hugbúnaði sem leigutaki setur upp eða geymir á búnaðinum. Leigusali áskilur sér rétt til að loka aðgangi að búnaði eða endurkalla hann ef grunur vaknar um misnotkun eða brot á þessum skilmálum.

10. Viðhald og tækniaðstoð

Ef bilanir koma upp sem ekki má rekja til gáleysis eða mistaka leigutaka, mun leigusali veita viðgerð eða skipta út búnaði án aukakostnaðar. Ef bilun stafar af röngum notum eða vanhirðu, getur kostnaður vegna viðgerðar eða skipta verið innheimtur af leigutaka.

11. Skil á búnaði

Við lok leigutíma skal búnaður afhentur í sama ástandi og við afhendingu, að teknu tilliti til eðlilegs slits. Leigusali framkvæmir úttekt á búnaðinum við skil og áskilur sér rétt til að innheimta kostnað vegna skemmda, vöntunar eða óhreininda.

12. Persónuvernd og gagnavarsla

Leigutaki ber ábyrgð á að taka afrit af sínum gögnum áður en búnaði er skilað. Leigusali getur endurstillt eða eytt öllum gögnum af búnaði áður en hann er afhentur næsta leigutaka. Leigusali ber enga ábyrgð á gögnum sem glatast við slíka endurstillingu.

13. Lög og varnarþing

Samningur þessi fellur undir íslensk lög. Rísi ágreiningur vegna leigusamnings eða skilmála skal hann rekin fyrir Héraðsdómi Reykjavíkur, nema annað sé ákveðið með samkomulagi.

14. Seinkunargjald

Ef búnaði er ekki skilað á umsömdum skiladegi áskilur leigusali sér rétt til að innheimta seinkunargjald að upphæð 2.500 kr. fyrir hvern dag sem liður frá samningsbundnum skiladegi og þar til búnaður er skilaður. Seinkunargjald kemur til viðbótar við venjulega leigu.

15. Uppsagnarákvæði

Leiga er ótímabundin áskriftarleiga. Leigutaki getur sagt leigunni upp hvenær sem er með skriflegri uppsögn. Tveggja (2) mánaða uppsagnarfrestur gildir og miðast hann við næstu mánaðamót eftir að uppsögn berst. Á uppsagnarfresti heldur leigutaki áfram að greiða mánaðarlega leigu samkvæmt samningi og ber ábyrgð á búnaðinum þar til honum hefur verið skilað.

Leigusali getur, að eigin mati og með skriflegu samþykki, fallist á styttri uppsagnarfrest en kveðið er á um í þessari grein, ef leigusali telji að aðstæður réttlæti slíkt. Slík undanþága telst ekki fordæmisgefandi og hefur ekki áhrif á rétt leigusala til að krefjast tveggja (2) mánaða uppsagnarfrests í öðrum tilvikum.

16. Óheimil notkun á tölvubúnaði

Uppsetning ólöglegs hugbúnaðar - Þar á meðal óleyfileg afrit, sprakkar, “crack” forrit eða hugbúnaður sem brýtur höfundarrétt. Niðurhal eða dreifing ólöglegs efnis T.d. höfundarréttarvarið efni, klámfengið efni sem brýtur lög, eða annað ólöglegt stafrænt efni. Óheimilt er að tengja PlayStation 5 við ólöglegan breyttan hugbúnað ("jailbreak") eða framkvæma slíkar breytingar.

Uppsetning spilliforrita eða áhættusamra forrita - Þar með talið forrit sem geta valdið tjóni á kerfinu, neti eða búnaði.

Breytingar á hugbúnaði eða stýrikerfi án leyfis - Óheimilt er að fjarlægja stýrikerfi, framkvæma “factory reset”, eða breyta kerfisstillingum sem hafa áhrif á virkni tölvunnar. Netaðgangur í ólögmætum tilgangi T.d. tölvuinnbrot, skönnun á netkerfum, dreifing árása (DDoS), svikastarfsemi eða önnur refsinæm nethegðun. Óheimilt er að breyta BIOS, UEFI eða öðrum vélbúnaðarastillingum án leyfis frá leigusala. Óheimilt er að opna, taka í sundur eða gera við búnað án skriflegs samþykkis leigusala. Óheimilt er að fjarlægja eða skipta út íhlutum, svo sem SSD, vinnsluminni eða öðrum vélbúnaði.

Lán eða framleiga búnaðar til þriðja aðila - Búnaður skal eingöngu nota af skráðum leigutaka nema annað sé samþykkt skriflega af leigusala.

Líkamleg misnotkun búnaðar - T.d. högg, raki, vökvi, yfirhitun eða önnur meðferð sem telst ekki eðlileg notkun.

Fjarlæging merkimiða, raðnúmera eða öryggiseininga - Allt slíkt er bannað. Öryggisráðstafanir - Leigutaki skal ekki afvirkja vírusvörn, eldveggi eða aðrar öryggisvarnir sem leigusali setur upp.

Viðurlög við brotum – Innheimta kostnað vegna viðgerða, enduruppsetningar eða tjóns. Innheimta búnað tafarlaust. Segja upp leigusamningi samkvæmt skilmálum. Vísa máli til viðeigandi stjórnvalda ef lögbrot eiga sér stað.